Personal nga gipangulohan ni Executive Secretary Ralph G. Recto, uban si Senator Juan Miguel Zubiri, ang pag-apod-apod sa pinansyal nga suporta atol sa Rice and LGSF Check Distribution nga gipahigayon sa Quezon Civic Arena, Libertad, Quezon, Bukidnon kagahapon Setyembre 04, 2026.
Subay sa maong kalihokan, matag usa sa 464 ka barangay sa tibuok lalawigan makadawat og ₱200,000 nga dugang pondo gikan sa nasyonal nga panggamhanan.
Sa maong pondo, ₱100,000 ang gitagana alang sa lima ka Presidential Scholars sa matag barangay nga makadawat og tig-₱20,000 matag usa. Ang laing ₱100,000 magamit sa mga lokal nga programa ug proyekto nga direktang makatubag sa panginahanglan sa komunidad. Atol sa programa, gipangulohan ni Mayor Pablo “Poling” Lorenzo III ug Liga ng mga Barangay President Onjun Trania ang pagdawat sa ₱6.2 milyon nga tseke para sa 31 ka barangay sa lungsod sa Quezon, samtang 1,500 ka benepisyaryo usab ang nakadawat og tig-10 kilos nga bugas.
Gipahinumdoman ni Executive Secretary Recto ang mga Punong Barangay nga gamiton ang pondo sa hustong pamaagi ug ipunting sa tinuod nga gikinahanglan sa katawhan. Samtang, gipadayag usab ni Senator Zubiri ang padayon nga suporta sa gobyerno alang sa agrikultura, imprastraktura, ug edukasyon sa probinsya, sa kalihokan nga gitambongan sa mga opisyal sa lalawigan nga gipangulohan ni Governor Oniel Roque ug Vice Governor Clive Quiño
Photo Courtesy:Municipality of Quezon
