Gipatin-aw sa Valencia City Disaster Risk Reduction and Management Office o CDRRMO nga wala nila balibari ang paghatod sa usa ka pasyente paingon sa Malaybalay, apan kinahanglan una nga masunod ang ilang protocol sa pag-coordinate sa ospital nga maoy modawat sa pasyente.
Sa eksklusibong pakighinabi sa Juander Radyo Malaybalay ngadto kang Henry Dap-og Arrieta, Radio Operator sa Valencia CDRRMO, niabot sa ilang buhatan pasado alas-8 sa gabii ang pamilya nga nangayo og ambulansya alang sa usa ka babayeng manganakay. Giingon sa pamilya nga una silang miduol sa City Health Office apan wala sila mahatagi og transportasyon, hinungdan nga nilahos sila sa CDRRMO.
Sumala ni Arrieta, sa dihang ilang nasayran nga Malaybalay ang destinasyon, ilang gipahibalo sa pamilya nga kinahanglan una nilang tawagan ug i-coordinate ang ospital didto aron mahibal-an ang kahimtang sa pasyente ug ang mga kinahanglanon sa pagdawat niini.
Gipasabot usab niya nga bahin sa protocol sa CDRRMO ang pag-coordinate una sa receiving hospital sa dili pa ipadala ang ambulansya, aron masiguro nga adunay ospital nga modawat sa pasyente ug mahatagan kini dayon og tukmang pag-atiman.
Photo Courtesy:Mark Sales /PsyPsy
