Nakabsan sa kinabuhi ang 31-anyos nga mag-uuma human gipusil sa makadaghang higayon sulod sa usa ka tolda sa Purok 6, Barangay Embayao, Don Carlos, Bukidnon kaniadtong Setyembre 2, 2026, pasado alas-7:40 sa buntag.
Paspas nga miresponde ang mga sakop sa Don Carlos Municipal Police Station (MPS) sa panginguna ni PMAJ Al-Nico R. Haman human makadawat og taho gikan sa usa ka myembro sa Civilian Volunteer Organization (CVO).
Subay sa imbestigasyon ug pahayag sa saksi, namahaw ang biktima uban sa iyang mga kauban sa trabaho sa tubuhan sa dihang kalit nga misulod ang suspek nga giila nga alyas “Janjan” nga nagbitbit na og armas. Walay daghang lalis gipusil sa suspek ang biktima. Nasayran nga daan nang nagkailhanay ang duruha tungod sa ilang pagpanguma sa maong dapit.
Dali sab nga gidala ang biktima sa Maramag Provincial Hospital apan gideklarang dead on arrival sa doctor. Sa karon ang Don Carlos MPS padayong nagpatuman sa hot-pursuit operation ug OPLAN SHIELD alang sa pagdakop sa nakasibat nga suspek samtang gisuta ang motibo sa maong pagpamusil
Photo Courtesy:Don Carlos Municipal Police Station
