Padayon nga misaka ang mga kaso sa leptospirosis sa tibuok nasod tungod sa serye sa mga pagbaha nga gidala sa habagat, diin nakatala ang Department of Health (DOH) og 77 porsyento nga pag-uswag sa mga nasakit gikan lang sa Agosto 2 hangtod 29.
Base sa datos sa DOH gikan Enero hangtod Agosto 29, miabot na sa 6,253 ang kinatibuk-ang kaso sa nasod diin 378 na ang namatay, ug ang Metro Manila ang nakatala sa pinakadaghang kaso nga miabot sa 1,961, kasagaran gikan sa Maynila ug Quezon City.
Tungod sa nagakataas nga peligro sa maong balatian nga naggikan sa ihi sa ilaga, mibalik sa pagpasidaan ang mga awtoridad sa panglawas ngadto sa publiko nga likayan gyud ang paglusong sa tubig-baha.
Gitambagan usab ang tanan nga kon dili malikayan ang pagtabok sa baha, mugamit gyud og proteksyon sama sa bota ug moadto dayon sa pinakaduol nga center o ospital aron makatumar og preventive nga tambal kon adunay gipilasan nga bahin sa lawas
Photo Courtesy: Philippine News Agency
