Kapin sa 1,700 ka mga estudyante ug magtutudlo sa Indonesia ang nag-antus sa pagsakit sa tiyan, kalibanga, ug pagsuka tungod sa gituohang food poisoning human mokaon sa libreng pagkaon gikan sa pundo ug programa sa gobyerno.
Ang pinakabag-ong insidente nahitabo sa usa ka senior high school sa Lasem, Central Java, diin 752 ka estudyante ug 25 ka magtutudlo ang nasakit human nakakaon og grilled chicken nga gihulagway sa usa ka food taster nga lapot o “slimy” na sa wala pa gipanghatag. Aduna usab susamang mga kaso nga natala sa Sidoarjo, Nganjuk, ug West Sumatra karong semanaha diin pipila sa mga biktima ang kinahanglang gidala sa ospital.
Gipangulohan ang maong libreng meal program sa National Nutrition Agency ug gilunsad ni Indonesian President Prabowo Subianto aron matabangan ang nutrisyon sa minilyon nga mga bata sa nasod.
Tungod sa nagsunod-sunod nga gidaghanon sa mga nasakit sa nagkadaiyang dapit, nanawagan ang usa ka magbabalaod nga susihon ang tibuok sistema sa pagpatuman ug pag-andam sa pagkaon sa maong programa aron masiguro ang kaluwasan sa mga estudyante
Photo Courtesy:The strait Times
