Mitala na sa 56 ka ihap ang mga centenarian-beneficiaries sa lalawigan kansang nadawat sa tag ₱50,000 nga cash incentive ug food packs gikan sa Provincial Government of Bukidnon (PGB), human nadugangan kagahapon Setyembre 02, 2026
Personal nga gitunol ni Governor Rogelio Neil “Oneil” Roque ang maong tabang ngadto sa upat ka bag-ong nalista gikan sa Valencia City—sila Lola Julia Lacre (100), Lola Patricia Sanjurjo (103), Lolo Alejandro Maghinay (106), ug Lola Carmellina Villas (101). Talagsaon usab nga lima sa maong mga benepisyaryo (tulo ka babaye ug duha ka lalaki) ang pulos na nagpangidaron og 106 anyos, nga mao karon ang giila nga mga oldest living centenarians sa probinsya.
Sa kasamtangan, anaa sa 34 sa 56 ka nalista nga centenarians ang padayong buhi ug nakapahimulos sa maong suporta alang sa ilang mga panginahanglan sa katigulangon.
Nagsugod ang maong programa sa PSWDO kaniadtong 2024 nga adunay 31 ka unang nalista, gisundan sa 16 kaniadtong 2025, ug nadugangan og 9 pa karong tuiga. Ang matag-tuig nga paghatag og pondo kabahin sa padayong pagpasidungog sa pamunoan sa lalawigan sa dako ug makasaysayanong tampo sa mga katigulangan sa katilingban sa Bukidnon.
Photo Courtesy:LGU Bukidnon
