Napuno sa kalingawan ug panaghiusa ang opening program sa 126th Civil Service Month Celebration sa Valencia City nga gipahigayon kaniadtong Septiyembre 2, 2026 sa City Hall Covered Court. Ubos sa tema nga “Bawat Kawani, Lingkod Bayani: Puso, Dangal, at Galing Para sa Bayan,”ang maong selebrasyon nagtumong sa pagpasidungog sa mga kawani sa gobyerno ug pag-ila sa ilang dedikasyon ug maayong pag-alagad sa katawhan.
Madasigong mga paagi ang nagbukas sa aktibidad pinaagi sa usa ka torch relay ug lighting of torch, banner pulling, ug oath of sportsmanship, nga gisundan dayon sa Third Kind Dancesport Competition ug Drag Queen Race Competition. Pormal nga gipaluyohan ang kalihokan ni Spokesperson Jun Galario, mga miyembro sa 10th Sangguniang Panlungsod, mga Department Heads, ug mga ulo sa nagkalain-laing ahensya ug national offices.
Sa ilang mga mensahe, gipasiugda ni City Vice Mayor Greizl Galario-Fernandez ang kahinungdanon sa panaghiusa alang sa episyente nga pagserbisyo, samtang gipasalamatan sab ni City Mayor Amie Galario ang mga kawani sa ilang makanunayong kontribusyon ug giawhag sila nga ipadayon ang pag-alagad nga adunay kasingkasing, dignidad, ug kahanas sa tanang Valenciano.
Photo Courtesy: LGU Valencia City
