Gidagsa sa mga tuna handliners ang gipahigayon nga 6th All About Tuna Handline Summit sa Robinsons, General Santos City, isip kabahin sa selebrasyon sa Tuna Festival 2026 niadtong Setyembre 2,2026.
Tumong sa maong summit ang paghatag og pagtagad ug pagpasidungog sa mga tawo nga anaa sa luyo sa kalampusan sa tuna industry sa dakbayan, ilabina ang mga mangingisdang nagapanginabuhi pinaagi sa handline fishing.
Gisaulog ang summit karong tuiga ubos sa tema nga “Layag Sama-Sama Tungo sa Pagbangon sa Tuna Handline.” Sa iyang mensahe, gipasiugda ni Kendrick Teng, presidente sa SAFII, ang mga kalisdanan nga padayong giatubang sa mga tuna handliners, ilabina ang epekto sa pagsaka sa presyo sa krudo.
Bisan pa niini, iyang giila ang dakong sakripisyo sa mga mananagat aron mapadayon ang ilang panginabuhian ug ang kalig-on sa tuna industry sa General Santos City.
Mihatag usab og mensahe si General Santos City Mayor Lorelie Pacquiao ngadto sa mga mananagat, diin iyang gipasidunggan ang dakong kontribusyon sa mga tuna handliners sa pagkaila sa General Santos City isip Tuna Capital of the Philippines.
Gipasiugda sa mayor nga kung wala ang mga mananagat, walay tuna industry nga mahimong sentro sa selebrasyon ug walay Tuna Festival nga ipahigayon sa dakbayan.
Gawas sa mga diskusyon atol sa summit, gipahigayon usab ang nagkalain-laing service booths diin makadawat og serbisyo ug impormasyon ang mga partisipante gikan sa mga lokal ug regional government agencies, ingon man sa pribadong sektor.
Lakip sa mga ahensyang miapil ang SSS, PhilHealth, China Bank, FPOP ug uban pang partner agencies. Gilauman nga pinaagi sa maong kalihokan, mas mapalig-on ang panaghiusa ug kooperasyon tali sa mga tuna handliners, stakeholders ug nagkalain-laing ahensya alang sa padayong paglambo ug pagpalig-on sa tuna handline industry sa General Santos City.
