Gipasalig ni Presidente Ferdinand R. Marcos Jr. ngadto sa mga Pilipinong naapektuhan sa kaylap nga pagbaha nga padayon ang gobyerno sa paghatag og hinanaling tabang ug hinabang sa mga apektadong komunidad.
Matod pa ni Palace Press Officer Claire Castro niadtong Lunes, padayon nga gibantayan ni Marcos ang kahimtang sa mga lugar nga grabeng naapektuhan sa pagbaha. Gani, personal kining mibisita ug nag-inspeksyon sa pipila ka mga lugar sa Bulacan ug Pampanga ug nakigpulong sa mga lokal nga opisyal aron masuta ang ilang mga panginahanglan.
Kalabot niini, gimandoan sa Presidente ang mga opisyal sa Gabinete nga siguruhon ang igo nga suplay sa pagkaon, non-food items, tambal, ug hustong pagdumala sa mga evacuation center alang sa mga apektadong residente.
Samtang nagpahimangno usab si Marcos ngadto sa mga hingtungdang ahensya nga ipadayon ang mga lakang alang aron masulbad ang problema sa pagbaha.
Gipahinumdoman usab sa Presidente ang mga apektadong residente nga magpabiling alerto ug mosunod sa mga pahimangno sa mga lokal nga otoridad, ilabina kung gikinahanglan ang pagbakwit alang sa ilang kaluwasan.
Photo Courtesy: PCO
