Gipahimangnoan ang mga Pilipinong anaa sa China ug kadtong nagplanong mobiyahe ngadto sa nasud nga mosunod sa mas hugot nga visa, travel document ug entry requirements nga ipatuman sugod Septiyembre 15.
Matud sa Philippine Embassy sa Beijing, kinahanglan nga ang visa category sa usa ka biyahero motakdo sa aktuwal nga katuyoan ug kalihokan niini sa China. Mahimong mangayo ang Chinese authorities og dugang supporting documents, lakip ang electronic records, aron mapamatud-an nga lehitimo ug legal ang gideklarang katuyoan sa pagpabilin.
Gipasidan-an usab ang mga aplikante batok sa paggamit og peke o sayop nga dokumento, nga mahimong hinungdan sa visa rejection ug entry ban. Giklaro sa embahada nga dili pugngan sa bag-ong regulasyon ang lehitimong pagbiyahe basta kompleto ug husto ang mga requirements.
Photo Courtesy: Philippine News Agency
