Mokabat sa P27.410 bilyon nga pondo alang sa medical assistance ang gipagawas sa Department of Budget and Management (DBM) aron matabangan ang mga kabus ug financially incapacitated nga mga Pilipino sa tibuok nasud.
Sumala sa DBM, gamiton ang pondo alang sa padayon nga implementasyon sa Medical Assistance to Indigent and Financially Incapacitated Patients (MAIFIP) Program sa Department of Health (DOH). Ubos sa maong programa, hatagan og pinansyal nga tabang ang mga pasyente nga dili na makabayad sa tibuok gasto sa ilang pagpaospital, pagpatambal ug uban pang medical services. Lakip sa mahimong matabangan pinaagi sa programa ang mga gasto alang sa hospitalization, medisina, emergency treatment, professional fees sa mga doktor ug uban pang panginahanglanon sa panglawas.
Dako usab nga bahin sa gipagawas nga pondo ang igahin ngadto sa mga Centers for Health Development (CHDs) aron masuportahan ang paghatod sa medical assistance pinaagi sa ilang partner nga local government hospitals, pribadong health institutions ug uban pang health facilities sa lain-laing bahin sa nasud. Suportahan usab sa maong pondo ang mga DOH hospital sa Metro Manila ug sa nagkalain-laing rehiyon. Apil usab sa programa ang pagpatuman sa electronic MAIFIP (eMAIFIP ) pinaagi sa eGovPH Super App aron mapadali ug mapa-access sa publiko ang pagproseso sa medical assistance.
Sumala kang Budget Secretary Kim Robert de Leon, tumong sa pagpagawas sa maong pondo nga masiguro nga ang tabang sa gobyerno direktang mahatod ngadto sa hospital level, ilabina sa mga pasyente nga nanginahanglan og pinansyal nga suporta.
Gilauman nga ang maong pondo makatabang sa mga pamilyang nag-atubang og pinansyal nga kalisod samtang nanginahanglan og medikal nga pag-atiman.
Photo courtesy: umnews
