Gitutokan sa Department of Environment and Natural Resources (DENR) Region 8 ang pagpangandam batok sa posibleng epekto sa El Niño sa Eastern Visayas, human gimando ni Regional Executive Director Arturo N. Salazar ang tanang buhatan ug field offices sa ahensya nga dihadiha maghimo ug magpatuman og mga plano aron mamenosan ang epekto niini sa kalikupan ug sa mga komunidad nga posibleng maapektuhan. Gipagawas ang direktiba atol sa 3rd Quarter Regional Management Conference, diin gipatawag ni Salazar ang Executive Committee sa DENR-8 aron repasuhon ang nahimong performance sa ahensya ug hisgotan ang nag-unang mga isyu sa kalikupan sa rehiyon.
Atol sa komperensiya, gipasiugda ni Salazar ngadto sa mga opisyal sa Environmental Management Bureau (EMB), Mines and Geosciences Bureau (MGB), ug Provincial ug Community Environment and Natural Resources Offices (PENROs ug CENROs) ang panginahanglan sa sayo ug hiniusang mga lakang aron mamenosan ang epekto sa dugay nga ting-init ug kakulang sa ulan. Gimando niya nga unahon ang pagtipig ug maampingong paggamit sa tubig, pagpalig-on sa pagpanalipod sa mga watershed ug kalasangan, kanunay nga pagmonitor ug pagpanalipod sa mga tinubdan sa tubig, pagpahimutang og mga lakang batok sa sunog sa kalasangan, ug pagpalig-on sa koordinasyon sa mga lokal nga kagamhanan (LGUs) ug kaubang ahensya.
Gipasiugda usab sa opisyal ang pagpalapad sa Information, Education and Communication (IEC) campaign aron mapalambo ang kahibalo ug pagpangandam sa publiko sa posibleng epekto sa El Niño. Gisugo ang mga field offices nga aktibong makig-uban sa mga komunidad ug nagkalainlaing sektor aron mapalambo ang malungtarong pagdumala sa mga kahinguhaan sa kinaiyahan ug madasig ang hiniusang paningkamot sa pag-atubang sa mga hagit nga mahimong ipahinabo sa maong panghitabo sa klima.
Photo courtesy: DENR-8
