Giila ug gipasidunggan ang 29 ka senior citizen pinaagi sa paghatag kanila og tag-P10,000 nga cash gift ubos sa Expanded Centenarians Act sa Maragusan, Davao de Oro Oktubre 12, 2026.
Ang maong benepisyo gitagana ubos sa Republic Act No. 11982 o Expanded Centenarians Act of 2024, nga nag-amendar sa Centenarians Act of 2016. Pinaagi niini, ang mga kwalipikadong senior citizen nga nakaabot sa edad nga 80, 85, 90 ug 95 anyos nakadawat sa maong pinansyal nga ayuda, lakip ang sulat sa pag-ila ug pagpasidungog.
Gipangulohan sa National Commission of Senior Citizens (NCSC) Region XI ang pagpatuman sa programa ubos sa pagpangulo ni Regional Director Cesar A. Adegue IV, nga girepresentahan ni Area Coordinator John Ritrex Juanich, uban sa lokal nga panggamhanan sa Maragusan.
Tumong sa maong programa nga mahatagan og dugang suporta ug pag-ila ang mga senior citizen tungod sa ilang mga kontribusyon sa ilang pamilya, komunidad ug katilingban.
Pinaagi sa koordinasyon sa NCSC ug lokal nga panggamhanan, gipaniguro ang paghatag sa benepisyo ngadto sa mga kwalipikadong senior citizen nga sakop sa maong programa.
Photo courtesy: Philippine news Agency
