Nag-atubang karon og kasong murder ug attempted murder ang usa ka 18-anyos nga batan-ong lalaki human mipahigayon og dugo-ong pagpang-atake gamit ang espada sa Brinell School sa Fagersta, Sweden niadtong Agosto 21, 2026.
Patay ang usa ka 17-anyos nga babayeng estudyante samtang tulo pa ka ubang biktima ang nasamdan—diin duha kanila ang anaa pa sa grabeng kahimtang. Nadakpan ra usab dayon ang suspek sa sulod mismo sa maong tunghaan human kini gipusil sa miresponding kapolisan. Nagsul-ob og helmet ug nagdalag espada ang suspetsado sa dihang gihimo niini ang pag-atake.
Sa pagkakaron, gipatuman ang suspension ang klase ug bantay-sarado sa kapolisan ang maong tunghaan samtang padayon ang gihimong imbestigasyon sa mga awtoridad. Nakapahigayon na og kapin 80 ka interviews ang mga pulis ug nagplano pa sila nga hinabion ang halos 450 ka estudyante ug staff sa tunghaan alang sa dugang impormasyon.
Gawas sa pagkahibalo nga adunay daang kaso sa assault ang suspek gisusi usab sa mga imbestigador ang usa ka TikTok account nga may kalambigitan kaniya. Sa wala pa kini matangtang, nakita sa maong account ang mga video nga may kalabotan sa mga pagpang-atake sa mga ekswelahan ug usa ka litrato sa espada. Giimbestigahan na usab sa kapolisan ang duha ka pinuy-anan sa Fagersta nga gidudahan nga adunay koneksyon sa maong suspek aron matultolan ang tinuod nga motibo sa krimen
Photo Courtesy: Associated Press
