Patay ang usa ka 63-anyos nga mag-uuma human gipusil samtang nagbantay sa iyang kamaisan batok sa mga kawatan sa Purok 7 Nabunturan, Barangay Pinamula, Kibawe, Bukidnon niaging buntag, Agosto 21, 2026.
Nakaplagan sa iyang pamilya ang wala na’y kinabuhi nga biktima nga nag-hayang sa taliwala sa iyang umahan nga adunay samad sa pinusilan sa tuo nga bahin ilalom sa iyang ilok, human kini mibiya sa ilang panimalay niadtong Agosto 20 aron bantayan iyang mga tanom batok sa nagsige nga pagpangawat og mais sa maong dapit.
Subay sa taho sa Kibawe Municipal Police Station (MPS), nakadawat sila og tawag gikan sa usa ka concerned citizen sa dapit ug dali nga nagpadala og mga opisyal uban ang Rural Health Unit aron susihon ang sitwasyon.
Sumala sa usa ka Chief BPAT sa maong barangay, nakadungog ang iyang hipag og upat ka sunod-sunod nga boto sa pusil niadtong alas-8:00 sa gabii sa wala pa napalgan ang biktima. Padayon pa karon ang imbestigasyon sa kapolisan aron masuta ang motibo ug mailhan ang suspek, samtang nagpatabang na usab ang Kibawe MPS sa Provincial Forensic Unit (PFU) sa Malaybalay City alang sa pagsusi sa crime scene ug paghipos sa mga pisikal ug forensic nga ebidensya.
Photo Courtesy: Kibawe Municipal Police Station
