Patay ang 45-anyos nga babaye human gidunggab sa iyang 35-anyos nga silingan atol sa ilang kainit sa lalis sa Purok 3, Barangay Migcawayan, Lungsod sa Damulog, Bukidnon niadtong Huwebes sa buntag, Oktubre 8, 2026.
Sumala sa imbestigasyon sa Damulog Municipal Police Station (MPS), nahitabo ang insidente gikan sa panagbikil dihang gipadlocked matud pa sa biktima sulod sa ilang balay ang lola sa suspek nga nag-inusara.
Tungod sa maong gihimo sa biktima, naglagot ang suspek nga miresulta sa ilang init nga paglantugi hinungdan sa pagdunggab sa suspek sa biktima sa iyang liog ug dughan, kinsa gidala pa sa Kibawe Provincial Hospital apan gideklarar kining Dead on Arrival (DOA) sa nag-atiman nga doktor tungod sa grabe nga mga samad nga naangkon niini.
Human sa maong pagpanunggab, boluntaryong nitugyan sa iyang kaugalingon ang suspek ngadto sa mga opisyal sa barangay ug gidala sa Desk Officer sa Damulog MPS pinaagi sa usa ka SK Kagawad. Kasamtangang gitanggong sa estasyonan ang suspek samtang nagpadayon ang koordinasyon sa kapolisan sa pamilya sa biktima para sa pagpasaka og pormal nga kaso.
Photo courtesy:Damulog MPS
