Patay ang 46-anyos nga lalaki gikan sa El Salvador City human kini gitigbas sa iyang 68-anyos nga kainom sulod sa usa ka uma sa Purok 1, Barangay Basak, Talakag, Bukidnon, niadtong gabiing Oktubre 7, 2026. Naangkon sa biktima ang grabeng mga samad sa liog, ulo, ug wala nga kamot hinungdan sa iyang kalit nga kamatayon.
Nagsugod ang insidente sa usa ka init nga lalis ug sukmagay samtang nag-inom ang duha bandang alas-10:35 sa gabii. Sa dihang misulod ang suspetsado sa iyang kuwarto, gihawiran ug gibunalan pa kini sa biktima og botelya sa agtang, hinungdan nga mikuha og sundang ang suspek sa maong balay ug gipangtigbas ang biktima sa makapila ka higayon.
Dali nga miresponde ang mga personahe sa Talakag Municipal Police Station sa pangulo ni PMAJ Lance Elpedio Figuracion human nakadawat og tawag gikan sa usa ka concerned citizen.
Nadakpan gilayon ang suspetsado ug narecober ang gigamit nga sundang, diin gihuptan na kini karon sa mga awtoridad alang sa pagpasaka og saktong kasong kriminal
Photo courtesy: Talakag Municipal Police Station
