Giaresto sa kapulisan ang usa ka 33-anyos nga American national sa Davao City niadtong Oktubre 7, 2026, tungod sa giingong pagpugos, dili awtorisadong pagpakaylap sa pribadong mga hulagway, ug mga kalapasan nga may kalabotan sa VAWC ug Cybercrime Prevention Act.
Gidakop ang suspek atol sa entrapment operation nga gilusad sa Davao City Police ug Regional Anti-Cybercrime Unit 11. Narekober gikan kaniya ang cellphone, laptop ug United States passport.
Gikustodiya na ang suspek alang sa booking, dokumentasyon ug tukmang disposisyon. Susihon usab sa mga otoridad ang mga electronic device aron makatabang sa imbestigasyon ug matino ang posibleng gidaghanon sa mga biktima.
Giawhag sa kapulisan ang publiko nga ireport dayon ang mga kaso sa pagpang-abuso ug dili awtorisadong pagpakaylap sa pribadong mga hulagway, ug tipigan ang mga digital nga ebidensiya nga makatabang sa imbestigasyon.
Photo courtesy: SBS
