Patay ang tulo ka indibidwal, samtang 36 ang samaron human giatake ang duha ka airport sa Saudi Arabia, taliwala sa nagkakusog nga panagbangi sa Yemen. Usa ang namatay ug walo ang nasamdan sa King Khalid International Airport sa Riyadh, samtang duha ang patay ug 28 ang nasamdan sa mga pasilidad sa Abha Airport.
Giangkon sa Houthi group ang pipila sa mga pag-atake, lakip ang paggamit og mga drone batok sa airport sa Riyadh. Isip tubag, gipunting sa Saudi-led coalition ang kapin 80 ka giingong Houthi military sites sa nagkadaiyang lugar sa Yemen.
Giatake usab sa Houthis ang Aden International Airport gamit ang missile ug drone, hinungdan nga wala makapadayon sa landing ang usa ka flight gikan Cairo ug gibalhin ngadto sa Jeddah.
Matod sa International Organization for Migration, kapin 200,000 ka tawo ang nanghawa tungod sa nagpadayong panagbangi sa Yemen.
Photo courtesy: Dubai OFW
