Nagplano ang Department of the Interior and Local Government (DILG) nga magbutang og mga outpost sa barangay tanod sulod sa mga eskwelahan sa tibuok nasud isip dugang nga lakang alang sa seguridad.
Dugang pa sa ahensya nga ang maong plano namugna human sa pipila ka insidente sa kapintasan sulod sa mga eskwelahan nga miresulta sa pagkamatay sa mga estudyante ug uban pa. Ang maong sugyot nahisgutan tali sa DILG ug Department of Education (DepEd), ilabina human sa nahitabong trahedya sa Ateneo de Zamboanga University.
Matod pa ni DILG Secretary Jonvic Remulla, nga gihangyo sa departamento ang pagtugot nga makapahimutang og estasyon ang mga barangay tanod sulod sa mga eskwelahan aron mas mapalig-on ang presensya sa seguridad.
Gipasabot ni Remulla nga tungod kay kasagaran kaila sa mga barangay tanod ang mga estudyante sa ilang komunidad ug mahimo silang makatabang sa pagpakigsulti ug pagpahinumdom sa mga kabatan-onan bahin sa hustong pamatasan.
Sumala sa DILG, ang presensya sa barangay tanod sulod sa mga tulunghaan mahimong usa pa ka dugang nga mekanismo sa seguridad aron mapugngan ang posibleng mga insidente ug mapalambo ang kaluwasan sa mga estudyante, magtutudlo, ug kawani sa eskwelahan.
Photo Courtesy: DILG
