Dakpan ang upat ka indibidwal human mabungkag sa mga operatiba sa Philippine Drug Enforcement Agency Regional Office 11 o PDEA 11 ang usa ka gidudahang drug den sa Davao City. Gilusad ang buy-bust operation niadtong Biyernes sa gabii, Agosto 21, 2026, bandang alas-8:20, sa Artiaga Street, Purok 3, Barangay 33-D.
Kauban sa operasyon ang mga personahe sa National Bureau of Investigation Southeastern Mindanao Regional Office 11 o NBI SEMRO 11 ug City Mobile Force Company.
Nadakpan ang giingong tigdumala sa drug den nga si alyas “Eric,” 60 anyos, human matod pa kini namaligya og usa ka sachet sa gidudahang shabu nga nagkantidad og ₱1,000 ngadto sa poseur-buyer sa PDEA.
Apil usab sa nadakpan si alyas “Marvin,” nga giingong empleyado sa maong drug den, ug duha ka mga bisita nga sila alyas “Rodrigo” ug alyas “Wencesito.”
Sa operasyon, nasakmit sa mga awtoridad ang siyam ka sachet sa gidudahang shabu nga gibanabanang nagkantidad og ₱136,000. Nakuha usab ang nagkalain-laing drug paraphernalia ug ang marked money nga gigamit sa buy-bust operation.
Atubangon sa mga nadakpan ang mga kasong may kalabotan sa paglapas sa Republic Act 9165 o Comprehensive Dangerous Drugs Act of 2002.
