Gipataas sa Philippine Crop Insurance Corporation (PCIC) Region 9 ang coverage nga mahimong mapasiguro sa mga mag-uuma nga luna nga rehistrado sa Registry System for Basic Sectors in Agriculture (RSBSA) sa Zamboanga Peninsula.
Matud ni Isagani Templanza III, Chief sa Marketing and Sales Division, ubos sa bag-ong pagpatuman, mahimo nang mapasiguro sa tagsa-tagsa ka mag-uuma ang hangtod tulo ka ektarya nga luna, imbes nga per household sama sa unang pagpatuman.
Pinaagi matud pa sa maong pagpatuman, mas dako na ang luna nga mahimong ma-cover sa crop insurance alang sa kwalipikadong mga mag-uuma sa tibuok rehiyon. Segun ni Templanza, tumong sa maong lakang nga mas mapalambo ang proteksyon sa mga mag-uuma batok sa mga kadaot sa ilang pananom tungod sa kalamidad ug uban pang covered risks.
Samtang nanawagan usab si Templanza alang sa mga kwalipikadong mag-uuma nga siguruhong updated ug husto ang ilang impormasyon sa RSBSA aron makabenepisyo sa programa sa PCIC-9.
