Usa ka bag-ong pasilidad sa Ipil ang gilaoman nga makatabang sa pagpalambo ug pagpasayon sa paghatag sa serbisyong sosyal alang sa mga pamilya sa Distrito Dos. Pinaagi niini, mas mapaduol sa katawhan ang mga programa ug asisstance, mas mahapsay ang pagdumala sa mga serbisyo, ug mas komportableng lugar ang mahatag alang sa mga nagserbisyo ug sa mga benepisyaryo.
Gipasiugda nga pasiuna pa lamang kini sa dugang nga mga kalamboan nga gitumong aron mapalambo ang paghatag og serbisyo sa komunidad. Giplanong dugangan pa og usa ka building sa umaabot nga tuig 2027 aron mapalapad ang kapasidad sa Department of Social Welfare and Development o DSWD-SWADT Ipil sa pag-atiman sa mga panginahanglan sa katawhan.
Pinaagi sa padayong kolaborasyon sa DSWD, tumong nga mahimong mas dali ma-access, mas episyente, ug mas responsive ang mga serbisyong sosyal alang sa mga pamilyang nanginahanglan og tabang sa Distrito Dos.
Gipasiugda usab ang tumong nga dili lamang ang mga benepisyaryo ang makadawat og maayong serbisyo, kondili apil usab ang mga kawani nga naghatag niini. Kini kabahin sa pagpadayon sa programa alang sa usa ka “Hapi and Healthy nga Distrito Dos,” diin ang matag pamilya adunay mas maayong kahigayonan nga makadawat sa gikinahanglang asistencia ug suporta.
