Gideklarar nang state of calamity ang 106 ka mga siyudad ug lungsod sa Pilipinas tungod sa nagkagrabeng epekto sa El Niño, sumala sa pinakabag-ong report sa National Disaster Risk Reduction and Management Council o NDRRMC. Pinakadaghan niini anaa sa Cagayan Valley nga adunay 66 ka lugar, gisundan sa Caraga nga 23, Bicol nga 12, Calabarzon nga 4, ug Soccsksargen nga usa.
Kapin 388 mil ka indibidwal o 104,149 ka pamilya ang naapektuhan sa El Niño, lakip ang 201,322 ka mga mag-uuma ug mangingisda nga naapektuhan ang panginabuhian. Narekord usab ang kapin 223,497 ektarya sa agricultural areas nga nadaot, diin 41,164 ektarya ang gi-report nga hingpit nang nawala ang ani.
Samtang, mikabat na sa 5.56 bilyong pesos ang gibanabanang kadaot ug production losses sa agrikultura, diin 4.96 bilyon pesos niini gikan sa Cagayan Valley. Nagpadayon usab ang paghatag og ayuda sa mga apektadong komunidad, samtang gipaabot sa PAGASA nga mahimong magpadayon ang El Niño hangtod sa unang bahin sa 2027, nga posibleng magdala og dugang nga dry spell ug drought sa nagkadaiyang bahin sa nasod.
Photo courtesy:Riskline
