Mipadayon sa internasyonal nga entablado ang maayong performance sa Cordova Dancesport Team human makadaog og 18 ka gold, tulo ka silver ug tulo ka bronze medals sa Negeri Sembilan International Dancesport Championship 2026 nga gipahigayon sa Seremban, Negeri Sembilan, Malaysia.
Nag-una sa medal haul sila Lance Gonzaga ug Venice Mae Inoc nga nakakuha og tulo ka gold medals matag usa sa nagkadaiyang solo events.
Nagpakitang-gilas usab ang mga Under-12 athletes nga sila Nathalie Kate Jumao-As ug Raven Jovelle Tilacas, nga nakadaog og gold medals sa Beginner Synchronize Under-12 Samba, Jive ug Cha-Cha events, lakip ang ilang tagsa-tagsa ka solo events.
Gitapokan sa maong championship ang mga dancesport athletes gikan sa Pilipinas, Malaysia, Indonesia ug Thailand. Ang Cordova Dancesport Team kabahin sa Philippine delegation gikan sa Cordova, Lapu-Lapu City ug Cebu City.
Gibansay sa coach nga si Earl Medrano Llanos ang team, nga sobra na sa usa ka tuig nga nagpraktis ug regular nga moapil sa grassroots competitions sa Cebu. Bisan kalit-kalit ang ilang pag-salmot sa kompetisyon sa Malaysia, nakasalig ang mga atleta sa ilang kanunayong training sa Cordova.
Matud ni Llanos nga mapasigarbohon ug makatagbaw ang ilang nahimo, ilabina ang paningkamot ug dedikasyon sa mga atleta bisan panahon sa summer.
Photo Courtesy: Instagram
