Viral sa social media ang emosyonal nga unang pagkaon og karne sa content creator nga si Love Soo, nga mas nailhan kaniadto nga online isip “Mommy Tang,” human sa 14 ka tuig nga pagkinabuhi isip vegetarian. Si Soo adunay kapin 577,000 ka subscribers sa YouTube ug nailhan isip usa sa mga unang content creator sa vegan mukbang ug plant-based Korean recipes. Sulod sa kapin usa ka dekada, nahimong dakong bahin sa iyang public identity ang vegan lifestyle.
Sa katapusan ning bulan sa Hulyo, gipahibalo ni Soo nga iyang biyaan ang veganism. Sa iyang unang pagsulay sa pagkaon og karne, giluto sa iyang bana ang usa ka New York strip steak. Makita sa video nga nagkurog ug nahadlok si Soo sa wala pa paabuta ang first bite.
Matud niya, nasakitan usab siya kaniadto tungod sa mga pagpanaway nga iyang nadawat isip vegan. Sa iyang bana, miingon siya nga dili niya masabtan nganong daghan ang nagsulti og dili maayong mga butang batok kaniya tungod lamang sa iyang pagka-vegan.
Gidasig siya sa iyang bana ug gipahinumdoman nga dili niya kinahanglan pugson ang iyang kaugalingon sa pagkaon sa steak kung dili pa siya andam.
Apan mipadayon si Soo. Sa dihang nakatilaw na siya sa iyang first bite, mihilak siya ug miingon nga lami matud pa kaayo ang steak. Misunod pa ang ikaduhang ingkit uban sa ahos, diin mibuto na usab ang iyang emosyon samtang iyang gidayeg ang lami ug kahumok sa karne.
Sa usa pa ka mas taas nga video, gipatin-aw ni Soo ang iyang desisyon sa pagbiya sa plant-based diet. Matud niya, ang iyang pagka-vegan wala lamang nakabase sa etikal o environmental nga mga rason, apan naapil usab niini ang iyang dugay nang pagpangita nga mahimong mas niwang.
Matud pa niya, sa paglabay sa mga tuig, ang veganism nahimo nang porma sa pagpugong sa iyang kaugalingon sa pagkaon tungod sa iyang pagtan-aw sa kaugalingong lawas. Para kaniya, ang pagbiya niini daw sama sa paghulog sa bug-at nga ginapas-an nga iyang gidala sulod sa kapin usa ka dekada.
Nagkalain-lain ang reaksyon sa mga netizens. Adunay pipila ka dugay nang followers nga miingon nga ilang i-unfollow si Soo tungod sa iyang pagbalik sa pagkaon og karne.
Apan, daghan usab ang misuporta kaniya ug miingon nga personal niyang desisyon ang iyang pagkaon ug karne, ug wala’y katungod ang uban sa paghukom kaniya tungod sa iyang gipiling lifestyle.
Photo Courtesy: Daily Dot
