Doble ang kapakyasan sa usa ka gabii alang sa amateur MMA fighter nga si Lukasz Bukovac human siya mapildi sa iyang away ug gisalikway usab sa iyang girlfriend ang iyang marriage proposal.
Sa usa ka MMA event niadtong Hunyo 23, 2024, nakig-away si Bukovac sa usa ka two-on-one cage fight uban sa iyang kauban batok kang Jan Michalek. Bisan pa og duha sila batok sa usa, si Michalek gihapon ang midaog.
Human sa away, misaka pag-usab si Bukovac sa ring ug miluhod atubangan sa iyang girlfriend aron mag-propose og kasal. Apan imbes nga “oo” ang iyang madungog, gisalikway sa babaye ang proposal atubangan sa kapin 20,000 ka mga nanan-aw.
Matud sa babaye, iyang gisalikway ang proposal tungod sa mga nahitabo sa ilang relasyon ug sa iyang alegasyon nga dili matinud-anon si Bukovac ug adunay laing mga babaye nga iyang gikalambigitan.
Bisan pa sa paghangyo ni Bukovac nga usbon ang iyang desisyon, nagpabilin ang babaye sa iyang “dili.”
Human niini, mikaylap sa social media ang video sa maong insidente ug nahimong viral. Daghang netizens ang mitawag niini nga “0-2 in one night” o duha ka kapildihan sa usa ka gabii.
Samtang, gilimod ni Bukovac ang alegasyon nga siya adunay kuladidang, ug miingon nga wala siya aktuwal nga nangilad sa iyang girlfriend.
Ang maong insidente nahimong usa sa mga viral nga eksena sa MMA event, diin ang kapildihan sa cage gisundan pa gyud sa usa ka publikong rejection sa iyang marriage proposal.
Photo Courtesy: Fastbreak
