Gidakop ug gipamulta ang usa ka 26-anyos nga lalaki human nagsul-ob og costume ni Grim Reaper o Kamatayan ug misaka sa atop sa Ysbyty Glan Clwyd Hospital sa United Kingdom niadtong Hunyo 6,2026.
Base sa report, ang suspek naila nga si Leon Gillespie, kinsa nagtindog sa ibabaw sa entrada sa ospital sulod sa hapit 50 minutos samtang nagtan-aw sa mga pasyente ug empleyado, diin nagkupot usab dako nga scythe, usa ka klase sa gamit sa pang-ani nga kasagarang gigamit isip simbolo sa Grim Reaper.
Tungod niini, dali nga miresponde ang mga kapulisan uban sa kabomberohan aron atubangon ang maong insidente ug dakpon ang suspek.
Samtang pag-abot sa korte, giangkon ni Gillespie nga siya ang nakapahinabo sa kagubot sulod sa maong ospital ug iya usab giangkon ang pagpangawat og pagkaon sa iring ug pipila ka sinina.
Tungod sa iyang gibuhat, gipabayad siya ug kinatibuk-ang £350, o kapin ₱26,000, alang sa multa, bayad sa kadaot ug uban pang gasto sa kaso, diin apil na niini ang £200, o kapin ₱15,000, nga multa tungod sa kagubot sa ospital.
Photo Courtesy: Instagram
