Naabo ang 34 ka balay tungod sa nahitabong sunog sa Purok 6, Maraville, Brgy. Tabon niadtong Huwebes sa hapon, Agosto 6, 2026.
Base sa report gikan sa Bureau of Fire Protection (BFP) – Bislig City Central Fire Station, nadawat nila ang alarma alas 4:22 sa hapon ug daling niresponde ang mga bombero aron kombatihon ang kalayo. Gumikan kay anaa na sa “fully developed stage” ang maong sunog pag-abot sa mga responder, daling gisaka ang alarma ngadto sa 1st, 2nd, ug 3rd Alarm. Napugos usab ang BFP-Bislig sa pagpangayo og dinalian nga tabang gikan sa mga kasilinganang fire stations sa lungsod sa Hinatuan ug Lingig.
Tungod sa paspas nga pagtinabangay sa mga bombero, nadeklarar ang “Fire Under Control” alas 5:50 sa hapon ug hingpit nga “Fire Out” alas 6:50 sa gabii.
Sa inisyal nga assessment sa mga otoridad, moabot sa 34 ka mga panimalay ang naugdaw sa maong trahedya. Gibanabana usab nga mokabat sa ₱3 milyon ang danyos sa maong insidente, samtang padayon pa ang gihimong imbestigasyon aron sutaon ang tinuod nga hinungdan sa pag-ulbo sa kalayo.
Nagtinabangay na ang nagkalain-laing buhatan sa lokal nga kagamhanan sa Bislig alang sa gipahigayon nga assessment ug relief operations aron masiguro nga mapadangat dayon ang pagkaon, medical assistance, ug uban pang nag-unang panginahanglanon sa mga apektadong pamilya.
Photo courtesy: 𝗦𝘂𝗿𝗼𝘆 𝗦𝗲𝗿𝘆𝗲
