Giawhag ang mga delivery riders ug ride-hailing drivers nga rehistradong self-employed members sa Social Security System (SSS), mahimo nang makadawat og benepisyo ubos sa Employees’ Compensation (EC) Program kon makasinati sila og work-related nga sakit, aksidente, o disability.
Apil sa maong programa ang mga Transport Network Vehicle Service (TNVS) drivers ug uban pang app-based workers nga giila isip independent contractors. Apan, aron makakuwalipikar, kinahanglan nakabayad sila og labing menos usa ka buwang kontribusyon sa SSS sa wala pa mahitabo ang sakit o aksidente nga may kalabutan sa ilang trabaho.
Ang aplikasyon alang sa benepisyo mahimong isumite sa SSS sa mismong miyembro o sa iyang kapamilya sulod sa tulo ka tuig gikan sa petsa sa insidente. Sukad pa niadtong Septyembre 2020, gilapdan sa Employees’ Compensation Commission (ECC) ang coverage sa programa aron maapil ang tanang self-employed SSS members.
Matud ni Labor Secretary Francis Tolentino, kabahin kini sa pagpalig-on sa proteksyon alang sa mga mamumuo, ilabina sa mga gig workers nga adlaw-adlaw nag-atubang og peligro samtang nanginabuhi.
Gipasidaan usab sa ECC nga dili mahatagan og kompensasyon ang mga insidente nga resulta sa pagkahubog, tinuyoang pagpasakit sa kaugalingon o sa uban, ug grabeng pagpabaya.
Busa, giawhag ang tanang delivery riders ug TNVS drivers nga magparehistro sa SSS, magpadayon sa pagbayad sa ilang kontribusyon, ug siguruhong kompleto ang ilang mga dokumento aron dali silang makabenepisyo kon adunay mahitabong work-related nga insidente.
Photo Courtesy: The Rakyat Post
