Kapin 4,095 ka mga senior citizen gikan sa nagkadaiyang barangay sa General Santos City ang nakadawat og ₱2,000 Birthday Gift Incentive alang sa mga nagsaulog sa ilang adlaw’ng natawhan niadtong Mayo 2026. Ang maong insentibo kabahin sa programa sa Local Government Unit sa General Santos City ubos sa pagpanguna ni Lorelie Geronimo Pacquiao, isip pagpasalamat ug pag-ila sa mga senior citizen nga naghatag og dakong kontribusyon sa paglambo sa dakbayan.
Gipatuman ang distribusyon pinaagi sa panagtambayayong sa City Social Welfare and Development Office (CSWDO) ug sa Office of the Senior Citizens Affairs (OSCA) aron masiguro nga hapsay ug patas ang paghatag sa maong benepisyo ngadto sa mga kwalipikadong benepisyaryo sa matag barangay.
Dugang pa sa birthday incentive, ang maong programa kabahin sa padayong paningkamot sa lokal nga panggamhanan sa pagpalig-on sa social welfare programs alang sa mga tigulang, lakip ang paghatag og nagkadaiyang serbisyo ug ayuda aron matubag ang ilang mga panginahanglan.
Gipasabot usab sa LGU nga ipadayon ang maong inisyatiba isip usa ka paagi sa pagpakita og pag-atiman ug pagpasalamat sa mga senior citizen, samtang ginadasig ang mga kwalipikadong benepisyaryo nga magpadayon sa pag-update sa ilang rekord sa OSCA aron dili sila mapakyas sa umaabot nga mga programa ug benepisyo.
Photo Courtesy: LGU GENSAN
