Gihandom sa Kapamilya actor nga si Elijah Canlas ang iyang manghud nga si Jamile Matthew ‘JM’ Canlas sa ikatulong anibersaryo sa kamatayon niini.
Pinaagi sa iyang Instagram Stories, gipadayag ni Elijah nga hangtod karon wala gihapon mawala ang kasakit sa pagkawala sa iyang manghud ug iyang gisulat, “I miss you every single day. I love you more than anything.”
Si JM namatay niadtong 17 anyos pa lamang. Gihulagway siya sa ilang pamilya isip usa ka maalamon ug talentadong batan-on nga aktor, musikero, atleta, mag-aawit, debater ug gamer.
Sa usa ka miaging interbyu, giingon usab ni Elijah nga usa sa iyang pinakadakong pagmahay mao ang wala niya kanunay masulti kang JM kung unsa siya kaproud ug kung unsa niya kini kaayo gihigugma.
Human sa kamatayon ni JM, gitukod sa ilang pamilya ang KULIT: The JM Canlas Organization, usa ka organisasyon nga nagpalambo sa kahibalo bahin sa mental health, nagmugna og luwas nga mga lugar alang sa kabatan-onan, ug naghatag og suporta aron malikayan ang dugang pagkawala sa mga batan-ong kinabuhi tungod sa suicide.
Photo Courtesy: instagram
