Nakasulat sa kasaysayan ang usa ka inahan gikan sa Mali, nga si Halima Cissé human siya nanganak og siyam ka bata nonuplets sa usa lamang ka pagmabdos.
Sa unang ultrasound, pito lamang ka fetus ang nakita sa mga doktor. Apan sa dihang nanganak na siya, nadiskobrehan nga siyam diay ang iyang mga anak lima ka babaye ug upat ka lalaki.
Tungod sa taas nga risgo sa maong pagmabdos, gipadala si Halima gikan sa Mali ngadto sa Morocco aron maatiman sa mga espesyalista. Nanganak siya pinaagi sa Cesarean section kon CS sa ika-30 ka semana sa pagmabdos, ug ang tanang siyam ka bata gidala dayon sa Neonatal Intensive Care Unit kon NICU alang sa espesyal nga pag-atiman.
Bisan pa sa kalisod sa maong sitwasyon, luwas nga nakalingkawas ang inahan ug ang tanan niyang mga anak. Ang maong panghitabo giila isip usa sa talagsaong dokumentadong mga kaso sa kalibutan diin ang tanang siyam ka bata nagpabiling buhi human sa pagpanganak.
Photo Courtesy: Instagram
