Gipaspasan karon sa National Food Authority (NFA) sa Bukidnon ang pagpakigtambayayong ug pag-aghat sa tanang Local Government Units (LGUs) sa probinsya nga mopirma og Memorandum of Agreement (MOA) alang sa pagpondo ug pagpalit og bugas.
Gihimo ang maong lakang ubos sa mandato sa Republic Act 11203 o Rice Tariffication Law ug giamyendahan sa RA 12078 aron masiguro nga adunay igong buffer stock nga magamit sa mga relief ug rehabilitation operations sa panahon sa kalamidad ug emerhensya.
Kini ang gibutyag sa exclusive nga pakighinabi sa Juander Radyo Malaybalay kang Glenn De Otoy, Information Officer sa NFA Bukidno diin gitumbok nga pinaagi sa maong kasabutan, dali nga makapalit og bugas ang mga LGU gikan sa NFA sa dili pa, atol sa, o human sa bisan unsang krisis, lakip na sa pagpatuman sa mga programa sama sa rice allowance sa mga empleyado ug suporta sa BJMP ug DSWD
Sa pagkakaron, pormal nang nakig-MOA sa NFA ang LGU sa Cabanglasan, Maramag, ug Valencia City, samtang nagpadayon usab ang koordinasyon sa Malaybalay City ug Kalilangan.
Gipasalig sa NFA nga lig-on ug igo ang ilang kasamtangang supply nga makatubag sa panginahanglan sa tibuok probinsya sulod sa 22 ka adlaw samtang nagpaabot sa umalabot nga harvest season.
Gilauman usab nga mas mapalapdan pa ang ilang gipondong bugas sa mga bodega aron makapangandam sa hulga sa El Niño ug uban pang posibleng kalamidad sa probinsya.
Photo Courtesy: NFA – Bukidnon
