Gilunsad sa Kagamhanang Panlalawigan sa Bukidnon, pinaagi sa Provincial Health Office (PHO) ubos sa pagpangulo ni Dr. Gary Guido C. Tabios, Jr., ang pagsaulog sa National Family Planning Month ug Breastfeeding Awareness Month 2026 kagahapoon Agosto 4, 2026 sa Centennial Stage, Capitol Compound, Malaybalay City.
Dala ang temang “Ang Pamilyang Smart, Panalo! Tara, Usap Tayo sa Family Planning”, ang maong aktibidad gisugdan pinaagi sa usa ka advocacy parade nga gisalmotan sa PHO, City Health Office (CHO) sa Malaybalay, ug Provincial Population and Development Office (POPDEV).
Kining maong duha ka pagsaulog nagpahinumdom nga ang pagtukod og himsog nga pamilya magsukad sa sakto nga kaalam, responsableng pagpakapamilya, ug ang paghatag og maayong pundasyon sa matag bata. Ang family planning naghatag og gahum sa mga magtiayon sa pagplano sa ilang kaugmaon, samtang ang pagpasuso sa inahan naghatag sa bag-ong tawong bata og sakto nga nutrisyon, proteksyon, ug lig-on nga pundasyon alang sa iyang panglawas.
Sumala sa maong kampanya, ang usa ka SMART nga pamilya nagkahulogan sa, S – Sama-samang Nagpaplano (Nagkahiusa sa pagplano) M – May Tamang Kaalaman (Adunay saktong kaalam) A – Aktibong Nagpapasiya para sa Kalusugan (Madasigong nagdesisyon alang sa panglawas) R – Responsableng Pagpapamilya (Responsableng pagpakapamilya) T – Tiyak ang Masaganang Kinabukasan (Sigurado ang mauswagong kaugmaon).
Gipasiugda usab nga ang pagpasuso sa inahan mao ang usa sa labing maayong investment alang sa himsog nga kaugmaon. Pinaagi sa maong paghiusa, nagsubli ang lalawigan sa ilang pasalig sa pagpauswag sa kaalam sa pamilya ug pagbalangkas sa mas himsog ug mas lig-on nga komunidad sa tibuok Bukidnon.
Photo Courtesy:PHO – Bukidnon
