Gipirmahan ni Presidente Ferdinand Marcos Jr. ang Executive Order No. 121 nga nagtukod sa Electric Vehicle Incentive Strategy (EVIS) Program aron mapalig-on ang lokal nga paghimo og electric vehicles (EVs), makadani og dagkong pamuhunan, ug makamugna og dugang trabaho sa nasud.
Ubos sa programa, maghatag ang gobyerno og hangtod ₱60 bilyon nga fiscal incentives alang sa mga kwalipikadong tiggama sa Hybrid Electric Vehicles (HEVs), Battery Electric Vehicles (BEVs), ug mga piyesa niini.
Sumala sa Department of Finance, ang EVIS Program nagtumong sa pagpalapad sa lokal nga produksiyon sa EVs, pagkunhod sa pagsalig sa imported nga fossil fuel, pagpalig-on sa energy security, ug pagbutang sa Pilipinas isip usa ka sentro sa electric vehicle manufacturing sa rehiyon.
Matod ni Finance Secretary Frederick Go, ang EO 121 usa ka dakong lakang aron mahimong mas kompetitibo ang industriya sa electric vehicles sa Pilipinas ug makadani og dugang pamuhunan samtang makamugna og dekalidad nga trabaho alang sa mga Pilipino.
Sa ilawom sa programa, mahimo lamang marehistro sa matag manufacturer ang hangtod duha ka EV models, ug mahimong makadawat og Fixed Investment Support o Production Volume Incentives base sa ilang investment ug performance.
Gitakda usab sa gobyerno nga hangtod upat ka EV manufacturers lamang ang mahimong maapil sa programa, diin ang matag EV model mahimong makadawat og suporta nga dili molapas sa ₱15 bilyon. Kinahanglan usab nga makalunsad sila og lokal nga gihimong EV sulod sa tulo ka tuig gikan sa ilang pagparehistro.
Gisuportahan usab ni Trade Secretary Cristina Roque ang EO 121 ug miingon nga kini usa ka dakong lakang aron mahimong emerging hub ang Pilipinas sa electric vehicle manufacturing sa Asya ug makahatag og dugang oportunidad sa pamuhunan, teknolohiya, ug trabaho alang sa mga Pilipino.
Photo Courtesy:IBC
