Gilunsad sa Second Congressional Commission on Education (EdCom 2) ang usa ka online dashboard nga makatabang sa gobyerno, lokal nga panggamhanan, ug mga opisyal sa eskwelahan sa paghimo og mas epektibong mga polisiya alang sa early childhood development.
Gipakita sa plataporma ang datos bahin sa mga batang bansot, mga barangay nga walay Child Development Center (CDC), ug mga estudyante sa Grade 1 hangtod Grade 3 nga naglisod sa pagbasa. Ang impormasyon gikan sa National Nutrition Council, Philippine Statistics Authority, ug Department of Education.
Sa kasamtangan, ang dashboard adunay datos gikan sa 25,869-ka barangay, 48,255 ka eskuylahan, ug kapin 5.1 milyon ka mga bata nga gi-assess sa pagbasa. Base sa datos, 4.3 porsyento sa mga bata ang bansot, 11% sa mga barangay ang walay Child Development Center, ug 10% sa mga estudyante sa Grade 1 hangtod 3 ang giila nga naglisod sa pagbasa sa pagtapos sa School Year 2025–2026. Naghatag usab ang plataporma og mga graph nga nagtandi sa lokal nga datos ug sa national average aron mas dali matino ang mga lugar nga nagkinahanglan og tabang.
Sumala kang EdCom 2 Executive Director Karol Mark Yee, ang dashboard usa ka lakang aron mapalig-on ang transparency ug panaghiusa sa tanan nga sektor sa pagpauswag sa edukasyon ug kaayohan sa kabataan.
Gidugang usab ni External Engagements Lead, Jude Liao nga ang plataporma magsilbing komon nga basihan sa koordinadong aksyon sa mga LGU, ahensya sa gobyerno, mga eskuylahan, ug uban pang organisasyon aron mas epektibong matubag ang mga hagit sa early childhood development.
Photo courtesy: edcom2.gov.ph
