Nameligro nga mosamot pag-usab ang HIV epidemic sa tibuok kalibotan human mikunhod og 18 porsiyento ngadto sa $7.3 bilyon ang internasyonal nga pondo niadtong 2025, nga pinakagamay nga lebel sulod sa hapit duha ka dekada, sumala sa UNAIDS.
Sa taho nga gipagawas atol sa pagsugod sa usa ka internasyonal nga AIDS conference sa Brazil, mipahimangno ang ahensya sa United Nations nga ang kagubot sa politika ug pinansya mahimong makapapas sa mga kalampusan nga nakab-ot sulod sa daghang tuig batok sa HIV.
Matod sa UNAIDS, ang pagkunhod sa pondo resulta sa pagkunhod sa internasyonal nga suporta, ilabina gikan sa Estados Unidos nga kaniadto naghatag og 75% sa global HIV funding. Bisan pa nga nabalik ang pipila ka life-saving treatment programs human sa temporaryong paghunong sa pondo niadtong Enero 2025, nagpabilin gihapon nga limitado ang daghang prevention programs. Sumala sa ahensya, nameligro ang mga kalampusan nga nakapakunhod sa bag-ong HIV infections ug AIDS-related deaths ngadto sa pinakaubos nga lebel sulod sa kapin 30 ka tuig.
Gibanabana nga 1.2 milyon ka tawo ang natakdan sa HIV niadtong 2025, samtang layo pa gihapon ang kalibotan sa tumong nga matapos ang AIDS pag-abot sa 2030 tungod sa kakulang sa pondo ug uban pang krisis sa panglawas.
Bisan og nakatabang ang dugang nga domestic spending aron mapun-an ang kakulang sa foreign aid, dili tanan nga gobyerno nakahimo sa pagpuno niini. Sa sub-Saharan Africa, diin gikan ang hapit katunga sa bag-ong global infections, natala ang dagkong pagkunhod sa pondo sa prevention programs. Gipakita usab sa datos gikan sa Cameroon, Nigeria, ug Zambia nga mikunhod og kapin 50 porsiyento ang gidaghanon sa mga tawo nga nakadawat og pre-exposure prophylaxis (PrEP). Miingon ang UNAIDS nga ang pagkabalda sa HIV funding dakong epekto sa prevention, testing, ug mga serbisyo nga direktang makaabot sa mga tawo nga labing naapektuhan sa HIV.
Photo courtesy: Reuters
