Mokabat sa 24 ka mga estudyante ang namatay human sa dakong sunog nga miulbo sa duha ka eskwelahan sa Bukavu, sa sidlakang bahin sa Democratic Republic of Congo.
Kadaghanan sa mga biktima ang giingong namatay tungod sa stampede nga nahitabo atol sa kagubot ug pagpaningkamot sa mga tawo nga makagawas sa lugar.
Gidala usab sa mga otoridad ngadto sa mga ospital ang mga nasamdan aron hatagan og tukmang medikal nga pag-atiman. Gawas sa mga eskwelahan, kapin 300 ka mga panimalay ang gikatahong natupok sa dakong sunog nga mikaylap sa maong lugar.
Sa pagkakaron, padayon pa ang imbestigasyon sa mga otoridad aron mahibal-an ang hinungdan sa sunog ug ang tukmang mga sirkumstansya nga mitultol sa maong trahedya.
Photo Courtesy: The Journal Gazette
