Gipaabot ang bag-ong pagsaka sa presyo sa mga produktong petrolyo sunod semana, base sa lihok sa global oil prices. Sumala sa usa ka source sa oil industry, posibleng mosaka og P4.50 hangtod P5 kada litro ang gasolina, samtang P2 hangtod P2.50 ang diesel. Gibase ang projection sa Mean of Platts Singapore o MOPS ug foreign exchange trading gikan Septiyembre 7 hangtod 10.
Matud sa source, nagpadayon ang kusog sa diesel tungod sa hugot nga global supply ug pagsaka sa seasonal demand, samtang misaka usab ang presyo sa gasolina sa Asia tungod sa supply concerns, ubos nga Chinese exports ug maintenance sa pipila ka refinery.
Opisyal nga ipahibalo ang aktuwal nga price adjustment sa Lunes, Septiyembre 14, ug epektibo kini sa Martes, Septiyembre 15. Kini mosunod sa oil price hike niining semanaha diin misaka og P4.69 kada litro ang gasolina, P5.18 ang diesel ug P5.58 ang kerosene.
Gilauman nga magpabiling sentro sa atensyon sa mga motorista ug commuter ang sunod nga pump price adjustment tungod sa posible na usab nga dugang gasto sa transportasyon.
Photo Courtesy: PNA
