Misamot matud pa ang tensyon sa Middle East human sa sunod-sunod nga pag-atake nga nalambigit sa Iranian-backed Houthis sa upat ka siyudad sa habagatang bahin sa Saudi Arabia. Gikataho nga 73 ka tawo ang nasamdan, samtang pipila ka pasilidad sa lana ang nasunog tungod sa mga pag-atake.
Nagpataas kini sa kabalaka bahin sa seguridad ug kalig-on sa suplay sa enerhiya sa rehiyon. Samtang, giingong gilaglag sa U.S. military ang lima ka Iranian crude oil tanker human gi-target sa Iran ang usa ka barkong pang-gyera sa U.S Navy gamit ang ballistic missiles.
Mitubag usab ang Iran pinaagi sa missile attack batok sa usa ka base militar sa U.S. sa Jordan. Tungod sa nagkagrabeng tensyon, misaka ang presyo sa Brent crude oil ngadto sa pinakataas nga lebel sukad Hulyo 23.
Bisan pa niini, nagpabilin gihapon kini ubos sa $100 matag bariles. Gipahibalo usab sa Iran nga posible nilang targeton ang mga oil tanker nga moagi sa Kuwait ug Bahrain, nga dugang nga nakapukaw sa kahadlok sa posibleng pagkabalda sa suplay sa lana.
Gisubay pag-ayo sa mga merkado sa kalibutan ang sitwasyon tungod sa posibilidad nga ang nagkagrabeng tensyon sa Middle East mahimong makaapekto dili lamang sa suplay sa enerhiya, kondili usab sa presyo sa mga palaliton ug sa pangkalibutang ekonomiya.
Photo Courtesy: Manara Magazine
