Gidawat sa standing ovation ang pahayag ni Presidente Ferdinand Marcos Jr. atol sa iyang State of the Nation Address (SONA) bahin sa isyu sa system’s loss nga ginapasa sa mga power company ngadto sa mga konsumidor. Gisaway sa Pangulo ang padayon nga pagsingil niini, nga matod niya dili man sala sa mga naggamit og kuryente. Sumala kaniya, panahon na aron tangtangon ang dugang bayronon nga dugay nang gipas-an sa katawhan.
Gipasabot usab ni PBBM nga ang system’s loss gikarga sa bill sa kuryente ug gidugangan pa og value-added tax (VAT), nga nakapabug-at pa sa gasto sa mga konsumidor. Tungod niini, iyang gipasiugda nga dili makatarunganon nga ang ordinaryong katawhan ang mopas-an sa bayronon nga dili sila ang hinungdan.
Tungod niini, nanawagan ang Pangulo nga usbon ang Electric Power Industry Reform Act (EPIRA) Law of 2001, diin nakabutang ang probisyon nga nagtugot sa bayronon. Ang iyang panawagan gisugat sa kusog nga palakpak ug pagtindog sa mga mitambong sa SONA isip timaan sa ilang suporta. Giila kini isip usa sa labing kusgan nga bahin sa iyang SONA nga direktang mitubag sa dugay nang reklamo sa mga konsumidor sa kuryente.
Photo courtesy: PHILIPPINE STAR/MIGUEL DE GUZMAN
