Nabugtoan sa kinabuhi ang 40-anyos nga lalaki human makaangkon og grabeng samad-dinunggaban sa wala nga ilok ug bukton sa Purok 2, Barangay Baclayon, Lantapan, Bukidnon, pasado alas 3:50 sa kaadlawon niadtong Setyembre 10, 2026.
Ang biktima giingong kalit nga misulod sa balay sa mga suspek nga nagbitbit og sundang ug nanigbas, apan gilayon nga misukol aron depensahan ang ilang kaugalingon ug gibaslan sa pagdunggab balik sa duha ka magsuong suspek nag-edad 36 ug 23 anyos.
Base sa imbestigasyon sa Lantapan Municipal Police Station, naangkon usab sa 36-anyos nga suspek ug samad-tinigbasan sa walang abaga samtang nakigbisog, hinungdan nga gidala kini sa Bukidnon Provincial Medical Center alang sa daling medikal nga pagtambal. Ang biktima pormal nga gideklarang patay sa Municipal Health Office sa nahishutang lungsod.
Diha-diha usab nga boluntaryong mitahan sa mga otoridad ang duha ka magsuon pagkahuman sa insidente aron atubangon ang proseso sa balaod. Sa kasamtangan, ang 23-anyos nga suspek nakakustodiya sa Lantapan MPS samtang padayon ang gihimong mas lawom nga imbestigasyon sa kapulisan aron matino ang kinatibuk-ang anggulo ug ang haom nga kasong ipasaka batok sa mga nalambigit.
Photo Courtesy:Lantapan Municipal Police Station
