Gitun-an karon sa Philippine National Police (PNP) ang usa ka sugyot nga limitahan ang paggamit sa social media ang mga kabatan-onan sa nasud.
Sumala ni PNP Chief Police General Jose Melencio Nartatez Jr., gusto nilang sundogon ang susamang palisiya nga gipatuman na sa Australia aron mapanalipdan ang mga batan-on gikan sa mga peligro nga nagpahoy sa cyberspace.
Ang maong sugyot nitumaw atol sa ika-44 nga ASEANAPOL Conference, diin ang mga lider sa pulisya sa nagkalain-laing nasud sa Southeast Asia nagbayloay og panan-aw bahin sa nagkadako nga hulga sa seguridad nga naglambigit sa mga batan-on. Usa sa mga kritikal nga ehemplo nga gihisgutan sa maong tigum mao ang nahitabong pagpamusil sulod sa usa ka eskwelahan sa Tacloban City nga naglambigit usab og mga kabatan-onan.
Gipasabot ni Nartatez nga human sa pipila ka serye sa tigom uban sa mga silingang nasud ug taliwala sa daghang diskusyon, aduna nay mga balaod nga mahimong ikonsiderar ug iduso alang sa pormal nga implementasyon sa Pilipinas. Tumong niini nga mahatagan og mas lig-ong proteksyon ug pamaagi sa pag-gabay ang mga batan-on batok sa mga dautang impluwensya sa internet.
Photo Courtesy: Philippine News Agency
