Putol ang ilong sa 37-anyos nga lalaki human gitigbas sa mag-amahang suspek samtang nag-inom didto sa Purok 7, Barangay Madaya, Pangantucan, Bukidnon alas 8:00 kagabii Hulyo 24, 2026.
Subay sa imbestigasyon sa Pangantucan Municipal Police Station nag-inom ang biktima ug ang 40-anyos nga amahan sa dihang adunay init nga lalis nga miresulta sa gubot. Giingong gitabangan sa maong amahan ug sa iyang 26-anyos nga anak ang biktima, diin mikompronta ang anak ug mibunot og sundang aron tigbason ang biktima. Sa pagsulay sa biktima nga makalikay naigo gayud ang iyang nawong nga maoy hinungdan sa hingpit nga pagkaputol sa iyang ilong.
Dali nga gidala ang biktima sa mga rescue personnel sa barangay paingon sa Pangantucan Medical Hospital apan gibalhin kini sa Bukidnon Provincial Hospital alang sa dugang nga pagtambal tungod sa kagrabe sa iyang samad.
Samtang nadakpan ra ang 40-anyos nga amahan sa tabang sa 2nd Special Forces Company ug anaa na sa kustodiya sa kapolisan, nagpadayon pa sab ang hot pursuit operation sa mga awtoridad aron madakpan ang 26-anyos nga anak nga maoy nisibat human sa panigbas.
Photo Courtesy: Pangantucan Municipal Police Station
