Gikatakdang mosalmot sa European Championships sa sunod nga bulan ang Swedish pole vault star nga si Armand “Mondo” Duplantis human gipadayag sa iyang ahente nga si Daniel Wessfeldt nga andam ug maayo na ang panglawas sa maong atleta.
Nahimo ang maong kumpirmasyon human sa iyang pag-atras sa Diamond League sa London sa miaging semana tungod sa naangkon nga injury sa iyang wala nga paa samtang misulay sa pag-abot sa 5.95 metros nga marka.
Matud pa ni Wessfeldt, wala na karon gibati nga bisan unsang kasakit si Duplantis ug nakabawi na kini para makasangka sa torneyo nga pagahimoon sa Birmingham City, England gikan Agosto 10 hangtod 16.
Ang 26-anyos nga duha ka higayon nga Olympic champion ug tulo ka higayon nga world champion nagpabilin nga usa sa labing dako nga pangalan sa Athletics human makabuak og world record sa pole vault sa 15 ka higayon, lakip na ang iyang pinakabag-o nga 6.31 metros nga rekord niadtong Marso sa Sweden.
Photo Courtesy: Red Bull
