Pormal nga gipahigayon ang seremonyal nga pagbendisyon sa lugar nga tukoran sa Valencia City Good Samaritan General Hospital (VCGSGH) niadtong Hulyo 22, 2026 sa Hagkol, Valencia City, Bukidnon. Gitambongan ang maong mahinungdanong kalihokan sa mga opisyal sa lokal nga panggobyerno sa panguna ni City Mayor Amie G. Galario, Vice Mayor Greizl Galario-Fernandez, mga miyembro sa Sangguniang Panlungsod, ug mga sakop sa sektor sa panglawas aron markahan ang pormal nga pagsugod sa proyekto nga gilaumang masugdan ang konstruksyon tali sa katapusan sa Setyembre ug Oktubre karong tuiga.
Gipresentar sa maong kalihokan ni Architect John Reubert S. Malaya ang architectural plan ug gambalay sa moderno nga pampublikong ospital, nga nagtumong sa paghatag og responsibo, episyente, ug modernong serbisyo medikal alang sa tanang Valenciano. Gipasiugda ni Committee on Health Chairperson Konsehal Jerusha A. Cadigal-Recla ug Former Mayor Jun Galario nga ang maong proyekto—nga giinspirar sa maayong Samaritano nga simbolo sa kalooy ug pag-atiman—usa ka dako ug dugay nang gipangandoy nga lakang aron matubag ang gikinahanglang pasilidad panglawas sa dakbayan.
Gilauman nga ang pagkatukod sa VCGSGH makatampo og dako sa pagpakunhod sa kahuot sa mga kasamtangang ospital ug makahatag og mas paspas, barato, ug duol nga serbisyo medikal ilabina alang sa mga kabus nga residente. Nagpadayag usab sa ilang lig-on nga komitment ug panaghiusa ang tibuok panggamhanan sa Valencia, diin gipatingban ni Konsehal Annalou Q. Zambrano ang kahinungdanon sa transparency ug koordinasyon sa tanang sektor aron masiguro ang hapsay ug malampusong paghuman sa maong pasilidad.
Photo Courtesy:Valencia City LGU
