Gipusil sa iyang nakaaway sa dalan ang 31-anyos nga lalaki didto sa Purok 5, Barangay Vintar, Valencia City alas 12:42 sa kaudtuhon kagahapon Hulyo 22, 2026. Giila ang biktima nga si Joel Lumasang Buladaco Jr., nga taga-Barra, Opol, Misamis Oriental ug empleyado sa Save Mar Cooking Oil Trading.
Naabtan sa pagrespondi sa kapolisan ang biktima nga nagkulob na duol sa sakyanan nga Isuzu Elf nga adunay samad pinusilan sa iyang likod kinsa daling gidala sa Valencia City Health Center sa tabang sa Valencia Rescue Team.
Gipadayag sa imbestigasyon nga nagsugod ang tensyon dihang gisita sa biktima ang usa ka lalaking nagmotor nga mohatag og dalan tungod kay wala kini sa hustong linya sa may Kapalong area padulong lungsod sa San Fernando.
Giingong nagsunod ang maong motorista ug nahitabo ang init nga lalis dihang nagdiskarga na og kargamento ang biktima, dayong sa kalit lang nibunot og armas ang suspetsado ug gipusil katulo ka higayon ang biktima sa wala pa misibat pabalik padulong sa dakbayan sa Valencia.
Nagpahigayon karon og hot pursuit ug dragnet operation ang kapolisan sa Valencia City alang sa posibleng pagsikop sa suspetsado
Photo Courtesy:Valencia City Police Station
