Patay na dihang napalgan ang usa ka 82-anyos nga senior citizen sa iyang farmhouse sa Purok 3, Barangay Anlugan, Cabanglasan, Bukidnon.
Sa eksklusibong pakighinabi sa Juander Radyo Malaybalay gikumpirma ni Police Captain Lenomer L. Caseres, Officer-in-Charge sa Cabanglasan Municipal Police Station, nga nagpadayon karon ang ilang imbestigasyon aron matino ang motibo ug mailhan ang responsable sa maong krimen.
Dugang pa niya nga nakadawat sila og report bahin sa usa ka patayng lawas ug dihang ilang gisusi ang lugar, ilang nasuta nga ang biktima, nga giila sa alyas nga “Lion,” nagpuyo lamang nga nag-inusara sa iyang farmhouse nga nahimutang mga lima ka kilometro gikan sa sentro sa Cabanglasan.
Nakit-an ang biktima nga nagbuy-od ug gigapos kung asa gibanabana sa SOCO (Scene of The Crime Operatives) nga lima hangtod pito ka adlaw na ang milabay sukad siya gipatay sa wala pa kini nadiskobrehan.
Sa inisyal nga report nakaplagan sa SOCO ang 14 ka samad dinunggaban sa tuo ug wala nga bahin sa dughan, lakip ang usa ka samad sa likod. Gidala ang lawas sa Villanueva Funeral Homes alang sa post-mortem examination.
Sa pagkakaron, wala pa’y klarong motibo o person of interest nga gikutlo sa kapulisan, apan padayon nilang gipalapdan ang imbestigasyon aron masulbad ang kaso ug mapanubag ang naghimo sa krimen.
Photo Courtesy: Cabanglasan Municipal Police Station
