Boluntaryong mitugyan sa ilang kaugalingon uban ang pipila ka armas ug bala ang duha ka kanhi miyembro sa Communist Terrorist Group (CTG) ngadto sa 1004th Maneuver Company Headquarters sa Sitio Masimag, Barangay Tagbak, Talakag, Bukidnon Hulyo 20, 2026 sa may alas 3:40 sa hapon.
Giila ang mga misurender nga sila alias “Mama”, 26 anyos, ug alias “Maria”, 27 anyos, pulos mga mag-uuma, maoy kanhi sakop sa Platoon Fury, Sub-Regional Committee 5 sa North Central Mindanao Regional Committee (NCMRC).
Kauban sa ilang pagbalik sa kagamhanan, gitugyan ni alias “Mama” ang usa ka kalibre .45 nga pistola nga adunay duha ka bala, samtang si alias “Maria” nagbitbit usab ug usa ka improvised shotgun nga adunay duha ka 12-gauge nga bala. Base sa rekord, silang duha nagsilbing tagahatag ug pagkaon sa maong grupo gikan tuig 2016 hangtod 2022, apan nakahukom nga mobiya sa armadong pakigbisog tungod sa nagkahuyang nga pwersa sa ilang grupo ug sa pagsurender usab sa ilang mga kabanay.
Sa pagkakaron, ang duha ka kanhi rebelde anaa na sa pagdumala sa 1004th MC, RMFB 10 alang sa custodial debriefing ug profiling, samtang ang ilang mga armas gidala na alang sa legal nga proseso.
Photo Courtesy: Police Region 10
